La Sportiva Skåla Opp har vore eit av dei fremste arrangementa i verda innan motbakkeløp, og eit fyrtårn innan motbakkeløp i Noreg. Over åra har heile 23 000 deltakarar frå 25 ulike land vore med, mellom dei mange av verdas beste motbakkeløparar. I tillegg har Skåla Opp trekt til seg hundrevis av turgåarar i trimklassen, som har skapt stemning langs løypa og jubel ved målstreken.

- Det har vore kvass kniving om å vinne Skåla Opp og sette nye løyperekordar. Vi har hatt OL-, VM- og EM-vinnarar frå fleire ulike idrettar inkludert den lokale skiskyttarhelten Johannes Thingnes Bø. Men dei som verkeleg lagar showet i Skåla Opp er mosjonistane. Dei startar utan tidtaking tidleg på morgonen, og er på toppen ved Skålatårnet og Skålabu 1843 m.o.h. når konkurranseløparane kjem stormande i mål. På det meste har det vore over 1 100 trimmarar på toppen og laga flott stemning når nesten 800 konkurranseløparar kjem over målstreken, seier Christian Prestegård, initiativtakar og sponsoransvarleg for Skåla Opp.

Folkefest og jubileum 13. august

I år blir Skåla Opp arrangert for 20. og siste gong. Det er fleire årsaker til det, mellom anna at løpet går i ein nasjonalpark, utfordringar med veret så høgt til fjells og tryggleiksvurderingar. I 2016 og 2018 måtte målgangen flyttast 700 høgdemeter ned til Skålavatnet på grunn av uver.

- Dessutan passar det godt å avrunde Skåla Opp-eventyret med å feire 20-årsjubileum. Etter bygginga av Loen Skylift, har Loen fått eit nytt eldorado for å arrangere fjelløp, med mål på toppen av Loen Skylift, seier Prestegård.

Planane for eit nytt fjelløp i Loen vil arrangøren kunngjere på premieutdelinga på Hotel Alexandra etter løpet.

- Vi ser fram til 13. august og vil feire Skåla-eventyret med eit stort jubileumsarrangement. Det er allereie stor interesse for å bli med på det siste Skåla Opp. Det er no berre 50 ledige plassar i konkurranseklassen . I trimklassen er det ikkje sett tak på tal deltakarar, så her er det berre å melde seg på. Med gode vermeldingar og utan koronarestriksjonar kan det vere mogleg å få over 1 500 deltakarar, trur Prestegård.

Tussa satsar i Stryn

Det er første året Tussa er sponsor av Skåla Opp.

- Stryn Energi har vore trufast støttespelar av Skåla Opp i mange år. No som Stryn Energi og Tussa har slått seg saman, og Tussa satsar i Stryn, er det naturleg at vi vidarefører sponsorengasjementet, seier Ann Kristin Einbu, kommunikasjonssjef i Tussa.

Tussa ønskjer å vere ein lokal og ansvarleg medspelar i kommunane som eig Tussa, og støttar kvart år over 200 ulike lag og organisasjonar i dei åtte kommunane.

- Skal vi skape attraktive lokalsamfunn å bu og arbeide i er vi avhengige av gode fritidstilbod. Vi er stolte over å kunne støtte både små og store lag og organisasjonar i området, og bidra til eit mangfald av kultur- og idrettsaktivitetar.